Revelation of John 15

Engel 7 Kaem ko gomang magara 7 tala wore iluwakasan

1Se ani loagawerem mu aking kausa biya bo kigilik nunguningkiri tala mu duruk wonong te aratam se arigem, mu engel 7, nuna kariimet te nunga maguwumonko mel memek 7 tala ago ilu se animan. Mu Kaem ko gomang magara te menarukko mel memek imi aratukko, ale udagi bo karogo me aratukko. ▼

▼Rev 15:1 Ikup 7 imi mu ikup bibiya nunguningkiri.

2Asele ani mel bo tala, gagi malin biya tama nikitang ningi aniso iwita, mu arigem. ▼

▼Rev 15:2-3 Gagi malin biya: Rev 4:6. Moses ko wur: Exo 15:1 agi Deut 32.

Se ko duap te, mu kariimet sanamingaman se nungarkem, nuna mel diwang mu se, ko kuar nungurman mu se, ko nup ko number mu arungu kagerman ale sokel ago sanami gilingiman. Nuna Kaem harp gita iwita mu nungaram mu ilu se ela se 3Kaem ko ura kari Moses ko wur, se Sipsip Gotek ko wur, mu ilu se animan. Mu iwita:

“Kari Biya Kaem, ni Sokel Karogo!
Ura mel suen biya beterem mu yawarakala nunguningkiri,
se ana aringiman ale nip patowasan!
Ni ali sor lilim la nunga Kari Biya.
Nika munan singir la betesan mu
diram la se nunguningta!
4Kari Biya, ni la kako biya!
Se awiri ni ko ko me nguangurukko?
Se awiri nika nip me patawurukko? Mena.
Kariimet lilim taimon ale nika nip patawomonko,
mu awuk, nika munan diram mu wetang te aratam se ari gilingiman.”
5Se udagi te ani duruk wonong te temple ningi kuwim kako nunguning mu ko kuring kaigam se arigem. 6Se engel 7 mel kariimet te nunga maguwumonko iluwaman, mu nuna temple mu beteman ale watingi arataman. Nuna guang ningo ningo nikinang biyala mu nagu gilingiman, ale guang biling maiya la, gold ago biguwura ale nunga, mu nokokosa te anikaso. 7Se mel marak anira 4 mu nunga ningi bo taiwir gold 7, Kaem pempem bagoso mu ko gomang magara ningi aniram, mu engel 7 mu suwan suwan nungaram. Se Kaem ko sokel, se ko nikinang, mu ko tama bur karogo temple naung ningi terong ma saparam. Se bo ta temple mu ningi kasu nagumonko me terong. Kaem ko gomang magara 7 engel 7 iluwaman mu aratu sapuruk asele ko.

8